PRENTSA ARETOA


bakea eta bizikidetza

Auzitegi Nazionalak bi herritar kartzelaratzeko aginduaren aurrean

Astelehenean Bizkaian atxilotutako bi herritarrak kartzelaratzeko agindua dela eta, SORTUk honako hau adierazten du:

1. Bistan da oraindik orain herri hau iraganera itzultzea nahi duten sektoreak existitzen direla, zehazki sakoneko estatuaren kasuan kosta ahala kosta borroka armatuaren mamua luzatzeko eta bizirik mantentzeko interesa oso nabarmena izanik, argiki Euskal Herriaren askapen bidea oztopatzearekin batera preso politikoen auzia betikotzeko asmoz.

2. Auzitegi Nazionalaren eskuhartzea salatzen du SORTUk. Espetxean beste bi lagun sartu ditu. Erabaki horrek ez die mesederik egiten Euskal Herriari, bakeari eta bizikidetzari. Berriz diogu: ez da espetxeak betetzeko unea, haiek hustutzekoa baizik.

3. SORTUk lanean jarraituko du preso politiko guztiak etxeratzea ahalbidetuko duen estrategia eraginkorren alde. Horretarako, adostasun zabalak bilatuko ditu hainbat eremutan, izan eremu sozialean, politikoan, instituzionalean zein sindikalean.

2020-11-18

-
bakea eta bizikidetza

Santi Brouard eta Josu Muguruzaren ekarpena balioan jarriko da ostiralean Bilbon egingo den manifestazioan

Santi Brouard eta Josu Muguruzaren konpromisoa eta dedikazioa balorean jarriko ditu SORTUk azaroaren 20an, ezker abertzaleko bi militanteen hilketen urteurren-egunean, Bilbon egingo duen manifestazioan. Hurrenez hurren, 36 eta 31 urte beteko dira aurten estatu-aparatuek Santi eta Josu hil zituztela.

‘Herriari emanak gara’ lelopean Bilboko kaleak zeharkatuko ditu, 19:00etatik aurrera. Aurten, Santi Brouard hil zuten kontsultatik abiatuko da manifestazioa, 19:00etan. Ondoren, Diego Lopez de Haro Kale Nagusitik udaletxeraino abiatuko da. Covidaren pandemia dela eta, antolakuntzak beharrezko segurtasun neurriak hartuko ditu kutsatzeko aukera murrizteko.

Ezker abertzaleko bi militante hauek erakutsitako konpromiso sondoa gogora ekarriko dugu manifestazio honetan. Izan ere, Santi eta Josu herriari emanak izan ziren bai haien esparru militantean bai haien lanbideetan. Euskal Herri aske baten alde zuten guztia eman zuten.

2020-11-17

-
bakea eta bizikidetza

Iñaki Bilbao 'Txikito'-ren gose eta egarri grebaren aurrean


Iñaki Bilbao ‘Txikito’ euskal preso politikoak azaroaren 2an gose eta egarri greba mugagabeari ekin zion, aurretik irailaren 9tik urriaren 29a arte gose eta komunikazio greba egin ondoren. Bi ekimenetan aldarrikapen bera planteatu du ‘Txikito’-k, hots: independentzia eta sozialismoa edota Euskal Estatu sozialistaren lorpena.

Iñaki Bilbaoren gose eta egarri grebaren aurrean ondoko irakurketa egiten du SORTUk:

   • Ezaguna da euskal preso politikoen aurka Estatu espainiarra hamarkadetan erabilitzen ari den salbuespenezko espetxe politika, eta ezagunak dira, halaber, bere ondorioak. Euskal gizartearen gehiengo sozial, sindikal, politiko eta instituzionalak behin eta berriro salatu bezala, presoen nahiz haien senideen eskubide urratzailea eta are legez kanpokoa den espetxe politika horrek sufrimendua, gaixotasuna, egoera zein ekimen desesperatuak eta are heriotza eragiten ditu.

   • Iñaki Bilbaok irailean ekindako gose eta komunikazio greba eta azaroaren 2an hasitako gose eta egarri greba independentziaren eta sozialismoaren lorpenerako borroka gisa aldarrikatzen ditu. Modu horretan planteatuta, ekimen horrek bukaera posible bakarra du: Iñakiren heriotza.

   • SORTUrentzat Iñakiren ekimenak ez du zentzurik, interpelazio edota eskaera gauzagarririk ez duenez gero, eta ez du zerikusirik Ezker Abertzalearen kultura politiko historikoarekin zein gurean gure herriarekiko konpromisoa jorratzeko baliatu izan ditugun moldeekin. Halaber, ez du zerikusirik uneotan Ezker Abertzaleak bai Euskal Herria askatzeko bai preso, iheslari eta deportatu politikoak etxeratzeko darabilen estrategiarekin. Ondorioz, ekimen hori ez dugu babesten, ez eta babestuko ere.

   • Edonola ere, ikuspuntu iraultzaile batetik, baita giza ikuspegi hutsetik ere, preso politiko baten halako erabaki baten aurrean ez gara ezaxola, Iñakiren balizko heriotzaren aurrean ezaxola ez garen bezalaxe, eta argi adierazten dugu Iñakiren ekimenak arestian aipatutakoa ez bezalako amaiera bat izan dezan nahi eta desio dugula.

   • SORTUk, euskal preso, iheslari eta deportatu politiko guzti-guztien eskubideen defentsa egin eta haien etxeratzea aldarrikatzen eta jorratzen jarraituko du, baita, Iñaki Bilbaoren kasuan bezalaxe, preso eta iheslari politikoen kolektiboak utzita eta Ezker Abertzalearengandik urrunduta dauden horien kasuan ere.

   • Preso, iheslari eta deportatu politiko guztiak etxean eta bizirik izatea da EPPKren eta Ezker Abertzale osoaren lehentasuna. Hori dela eta, euskal preso, iheslari eta deportatu politikoen etxeratzearen alde indarrak biderkatzeko deia egiten dugu beste behin ere.

2020-11-10

-
nazioartea

Ezker Independentista Luis Arceren karguhartzean egongo da

Asier Altuna Sortuko Nazioarteko Harremanetarako Idazkaria La Pazen da igande honetan Boliviako presidente eta presidenteorde berrien karguhartze ekitaldian egoteko.

Asier Altuna Europako Ezkerreko Alderdiaren delegazioarekin batera ailegatu da La Pazera, MAS IPSPeko lagun ezberdinekin elkartu eta ezker independentistaren babesa adierazteko Gobernu berriak egonkortasuna eta bake soziala berreskuratzeko izango duen lanean.

Bart Sebastian Michel MAS-eko bozeramaileak jakitera eman duenez, Luis Arce hautatutako Boliviako presidenteak, atentatu bat pairatu du La Pazeko egoitzan, bertan bilduta zegoelarik.

Gertaeran hauen aurrean, elkartasuna adierazi nahi diegu Luis Arce presidenteari, MAS-eko militantziari, eta Evo Moralesen agintaldian hasitako zikloarekin jarraitzeko gogoa duten boliviar guztiei.

2020-11-07

-
ekonomia eta bizi baldintzak

Eskuin muturrari bizkarra eman eta krisiari aurre egiteko inbertsio publikoen alde mobilizatzera deitzen dugu

Bart Bilboko Indautxu auzoan, eskuin muturrak egindako deialdiaren harira izandako mobilizazio eta istiluak direla-eta, SORTUk honakoa salatzen du:

  • Gogor salatzen dugu eskuin muturrak baliatu nahi izatea krisi sanitario, ekonomiko eta sozial hau bere agenda erreakzionarioa indartzeko, diskurtso ustez desobediente, anti-autoritario eta kontestatarioz mozorrotuta. Birusaren zabalpena eteten saiatzeko hartu diren neurri murriztaileak eta, oro har, krisi egoera hau eragiten ari diren ezinegona baliatu nahi dute euren agenda desdemokratizatzaile, eskubide murriztaile eta autoritarioa indartzeko, zer eta demokraziaren, askatasunaren eta antiautoritarismoaren izenean. Funtsean, sistemaren aurkako estetikaren atzean, sistema kapitalista patriarkala bera indartzea dute xede.

   • Gogor salatzen dugu, halaber, egoera honetara iritsi izanaren arduradun nagusia afera honen guztiaren kudeaketa negargarria egin duen eta egiten ari den administrazioen arduradun politikoak direla. Koronabirusari aurre egiteko estrategia argirik/eraginkorrik eza; beste behin ere halako neurri murriztaileak hartu behar izatea ekidin zezaketen inbertsioak (birusaren arakatze eta jarraipen ahalmenean, hezkuntzan, lehen arreta zerbitzuan, osasungintza, zahar-etxeetan...) egin ez izana; neurri murriztaile horiek, bai eta krisi sanitario, sozial eta ekonomikoak kaltetutako sektoreak eta pertsonak (hostalaritza, kulturgintza, autonomoak, ERTE-etan diren langileak, lana galdu dutenak, enpresari txikiak...) sustengatzera bideratutako laguntza publiko bideratu ez izana; mezu kontraesankor eta arduragabeen hedapena; pandemiari aurre egiteko “plana” prebentzio neurritan eta arestian aipatu inbertsioetan baino neurri murriztaile soiletan oinarritu izana... Horrek guztiak herritarren artean konfiantza baino egonezina, haserrea eta mesfidantza hedatu ditu, jarrera berekoi eta indibidualistei, kolore bateko zein besteko negazionismo eta konspirazionismoei eta eskuin muturrari berari bidea zabalduz eta halako erronka kolosal bati arrakastaz aurre egiteak ezinbestean eskatzen dituen kohesio, konfiantza, elkartasun eta erantzukizun sozialak nabarmen zailduz.

   • Guztiarekin, eta edonola ere, beste behin ere, behekooi dagokigu agintariek orain arte izan ez duten eta orain ere izaten ari ez diren ardurarekin jokatzea. Behekooi dagokigu osasun publikoaren defentsa sutsua egitea; interes eta ongizate kolektiboak interes eta ongizate indibidualen gainetik jartzea; komunitatearen zaintza sareak antolatzea... Haiek ez baitute guregatik egingo, eta krisi sanitario, sozial eta ekonomikoak norbait kaltetuko badu, behekoak garelako. Hala, bada, inoiz baino gehiago, elkar zaintzeko unea da; prebentzio neurriak zorrotz betetzekoa; udaberrian egin bezalaxe, gure herriaren sen kolektibo, komunitario, berdinzale eta solidario hori aktibatu eta, beste behin ere, geure onena ematekoa.

   • Aldi berean, mobilizatzen jarraitzeko deia egiten diogu euskal gizarteari, hasteko, izurriari aurre egin ahal izateko egin behar diren inbertsio publikoen alde, pandemiari aurre egiteko plana ez baitaiteke soil soilik neurri murriztaileetan oinarritu; are, gero eta inbertsio publiko gehiago egin, orduan eta neurri murriztaile gutxiago hartu beharko direlako. Eta, horrekin batera, burujabetzaren nahiz sakoneko eraldaketa sozialaren eta ekonomikoaren alde, pandemiak zerbait erakutsi badu, indarrean den sistema ekonomiko eta sozialaren hutsak eta bidegabekeriak eta herritarrak babeste aldera estatu propio bat izatearen garrantzia baita.


 

2020-10-30

-