PRENTSA ARETOA


euskal herria

Ertzaintzaren azken egunetako kargak direla eta

Ertzaintzaren azken egunetako kargak direla-eta, eta zehatzago, Donostian San Sebastian egunez izandako gertakari larrien harira, elkartasuna adierazten die Sortuk Ertzaintzak zauritutakoei eta honako balorazioa egiten du:

1. Mundu mailako pandemia betean gaude. Egoera honetan, sarri esan dugunez, elkar zaintzea eta arduraz jokatzea dagokigu guztioi.

2. Eusko Jaurlaritzak pandemiaren ondorioen kudeaketan egin duen gauza bakarra neurri murriztaileak hartzea izan da, izurriari aurre egiteko ardura osoa norbanakoaren gain utziz. Estrategia honen bidez Eusko Jaurlaritzak administrazio publiko gisa dituen ardurei ihes egiten die: uko egin dio birusaren hedapenari aurre egin ahal izateko Osakidetzan behar beste arakatzaile kontratatzeari, lehen arreta zerbitzua indartzeari eta txertaketa bizkortzeko egin beharreko inbertsioak egiteari, garraio publikoaren maiztasuna areagotzeari, kaltetutako sektoreak ekonomikoki sustengatzeari eta oro har zerbitzu publikoak indartzeari. Hori gutxi balitz, gardentasun faltaz jokatzen ari da eta horrek guztiak jendartean mesfidantza eta nekea areagotzen du, hain justu konfiantza eta kohesioa ezinbestekoak direnean.

3. Ertzaintza egunotan izaten ari den jokabidea guztiz justifikaezina eta onartezina da. Batetik, antzeko gertaeren aurrean jokabide zeharo ezberdina izaten ari da. Sektore sozial jakinak kriminalizatzeko nahia dago eta irmoki salatzen dugu. Bestetik, neurri murriztaileen ezein urraketak ez du egunotan erabiltzen ari den bortizkeria justifikatzen. Poliziaren helburua arazoak ekiditea izan beharko luke eta ez horiek sortu edo larriagotzea.

4. Agentearen “vamos a tirar a dar” larria justifikatzeko Zubiaga sailburu ordeak “prozeduraren parte dela” adierazi du. Bada, guk diogu jarduteko modu horren ondorio direla Iñigo Cabacasena bezalako heriotzak edo atzoko kargetako matrailezur hautsiak. Horrela jokatzen duen polizia ez da polizia demokratikoa. Ertzaintzan arazo handia dago. Polizia ereduari buruzko herri eztabaida sakona egin eta sakoneko erreforma egiteko garaia dela uste du Sortuk.

5. Zentzu horretan, Segurtasun Sailari dei egiten dio berehala amaitzeko poliziaren bortizkeriarekin, depuratu ditzala egunotako jazoeren arduradunak eta jarrera justifikaezin hauek justifikatu beharrean autokritika egin dezala. Eusko Jaurlaritzari arduraz jokatzeko deia egiten dio Sortuk. Ez diezaiela ihes egin bere ardurei. Pandemiari ezin zaio aurre egin neurri murriztaileekin soilik, are gutxiago borra golpeka.

2021-01-21

-
bakea eta bizikidetza

a

Astelehenean, hiru euskal herritarrek deklaratu beharko dute Auzitegi Nazionaleko epailearen aurrean inputatu gisa, 2002ko atentatu baten harira: Ruben Genbeltzu Gonzalez Arbizun bizi den andoaindarra, Jon Lizarribar Lasarte urnietarra eta Itxaso Zaldua Iriberri preso hernaniarra. Kasu honetan ere estatuak argi eta gerbi diosku ez duela gatazka politikoa gainditzeko inolako borondaterik, eta epaitegiak darabiltza iraganera kateatzeko. ETAren jarduera armatua orain dela ia hamarkada bat amaitu bazen eta erakunde hori desegin bazen ere, eskuin-mutur polizial, judizial eta mediatikoak era honetako sumarioak aurkezten dituzte herri honek bakean, bizikidetzan eta askatasunean aurrera egin ez dezan.

Era guztietara, bake, bizikidetza eta askatasun agertoki berri bat eraikitzeko herri honek duen determinazioa ezin dute zapuztu estamentu horiek. Bada garaia Estatuak behingoagatik bide politiko eta demokratiko hutsen aldeko apustua egin dezan, eta herri honen borondateari oztopoak jartzeari utz diezaion. Arduraz jokatzeko garaia da.

Berresten dugu gatazka politikoari irtenbide demokratikoa emateko ordua dela, eta ez errepresioan tematzekoa. Espetxeak husteko garaia da, ez haiek betetzen jarraitzekoa.

2020-12-23

-
bakea eta bizikidetza

Auzitegi Nazionalak bi herritar kartzelaratzeko aginduaren aurrean

Astelehenean Bizkaian atxilotutako bi herritarrak kartzelaratzeko agindua dela eta, SORTUk honako hau adierazten du:

1. Bistan da oraindik orain herri hau iraganera itzultzea nahi duten sektoreak existitzen direla, zehazki sakoneko estatuaren kasuan kosta ahala kosta borroka armatuaren mamua luzatzeko eta bizirik mantentzeko interesa oso nabarmena izanik, argiki Euskal Herriaren askapen bidea oztopatzearekin batera preso politikoen auzia betikotzeko asmoz.

2. Auzitegi Nazionalaren eskuhartzea salatzen du SORTUk. Espetxean beste bi lagun sartu ditu. Erabaki horrek ez die mesederik egiten Euskal Herriari, bakeari eta bizikidetzari. Berriz diogu: ez da espetxeak betetzeko unea, haiek hustutzekoa baizik.

3. SORTUk lanean jarraituko du preso politiko guztiak etxeratzea ahalbidetuko duen estrategia eraginkorren alde. Horretarako, adostasun zabalak bilatuko ditu hainbat eremutan, izan eremu sozialean, politikoan, instituzionalean zein sindikalean.

2020-11-18

-
bakea eta bizikidetza

Santi Brouard eta Josu Muguruzaren ekarpena balioan jarriko da ostiralean Bilbon egingo den manifestazioan

Santi Brouard eta Josu Muguruzaren konpromisoa eta dedikazioa balorean jarriko ditu SORTUk azaroaren 20an, ezker abertzaleko bi militanteen hilketen urteurren-egunean, Bilbon egingo duen manifestazioan. Hurrenez hurren, 36 eta 31 urte beteko dira aurten estatu-aparatuek Santi eta Josu hil zituztela.

‘Herriari emanak gara’ lelopean Bilboko kaleak zeharkatuko ditu, 19:00etatik aurrera. Aurten, Santi Brouard hil zuten kontsultatik abiatuko da manifestazioa, 19:00etan. Ondoren, Diego Lopez de Haro Kale Nagusitik udaletxeraino abiatuko da. Covidaren pandemia dela eta, antolakuntzak beharrezko segurtasun neurriak hartuko ditu kutsatzeko aukera murrizteko.

Ezker abertzaleko bi militante hauek erakutsitako konpromiso sondoa gogora ekarriko dugu manifestazio honetan. Izan ere, Santi eta Josu herriari emanak izan ziren bai haien esparru militantean bai haien lanbideetan. Euskal Herri aske baten alde zuten guztia eman zuten.

2020-11-17

-
bakea eta bizikidetza

Iñaki Bilbao 'Txikito'-ren gose eta egarri grebaren aurrean


Iñaki Bilbao ‘Txikito’ euskal preso politikoak azaroaren 2an gose eta egarri greba mugagabeari ekin zion, aurretik irailaren 9tik urriaren 29a arte gose eta komunikazio greba egin ondoren. Bi ekimenetan aldarrikapen bera planteatu du ‘Txikito’-k, hots: independentzia eta sozialismoa edota Euskal Estatu sozialistaren lorpena.

Iñaki Bilbaoren gose eta egarri grebaren aurrean ondoko irakurketa egiten du SORTUk:

   • Ezaguna da euskal preso politikoen aurka Estatu espainiarra hamarkadetan erabilitzen ari den salbuespenezko espetxe politika, eta ezagunak dira, halaber, bere ondorioak. Euskal gizartearen gehiengo sozial, sindikal, politiko eta instituzionalak behin eta berriro salatu bezala, presoen nahiz haien senideen eskubide urratzailea eta are legez kanpokoa den espetxe politika horrek sufrimendua, gaixotasuna, egoera zein ekimen desesperatuak eta are heriotza eragiten ditu.

   • Iñaki Bilbaok irailean ekindako gose eta komunikazio greba eta azaroaren 2an hasitako gose eta egarri greba independentziaren eta sozialismoaren lorpenerako borroka gisa aldarrikatzen ditu. Modu horretan planteatuta, ekimen horrek bukaera posible bakarra du: Iñakiren heriotza.

   • SORTUrentzat Iñakiren ekimenak ez du zentzurik, interpelazio edota eskaera gauzagarririk ez duenez gero, eta ez du zerikusirik Ezker Abertzalearen kultura politiko historikoarekin zein gurean gure herriarekiko konpromisoa jorratzeko baliatu izan ditugun moldeekin. Halaber, ez du zerikusirik uneotan Ezker Abertzaleak bai Euskal Herria askatzeko bai preso, iheslari eta deportatu politikoak etxeratzeko darabilen estrategiarekin. Ondorioz, ekimen hori ez dugu babesten, ez eta babestuko ere.

   • Edonola ere, ikuspuntu iraultzaile batetik, baita giza ikuspegi hutsetik ere, preso politiko baten halako erabaki baten aurrean ez gara ezaxola, Iñakiren balizko heriotzaren aurrean ezaxola ez garen bezalaxe, eta argi adierazten dugu Iñakiren ekimenak arestian aipatutakoa ez bezalako amaiera bat izan dezan nahi eta desio dugula.

   • SORTUk, euskal preso, iheslari eta deportatu politiko guzti-guztien eskubideen defentsa egin eta haien etxeratzea aldarrikatzen eta jorratzen jarraituko du, baita, Iñaki Bilbaoren kasuan bezalaxe, preso eta iheslari politikoen kolektiboak utzita eta Ezker Abertzalearengandik urrunduta dauden horien kasuan ere.

   • Preso, iheslari eta deportatu politiko guztiak etxean eta bizirik izatea da EPPKren eta Ezker Abertzale osoaren lehentasuna. Hori dela eta, euskal preso, iheslari eta deportatu politikoen etxeratzearen alde indarrak biderkatzeko deia egiten dugu beste behin ere.

2020-11-10

-