Euskal Herrian bizi dugun etxebizitza larrialdia salatzeko hiru eguneko dinamika aktibista egin dugu; lehen bietan Donostian, eta azkenekoan Bilbon. Putre funtsen eta jabe handien eraikinak seinalatu ditugu, baita haien espekulazio eta irabaziak ahalbidetu dituzten erabaki politikoak ere. Eskubideekin ez da espekulatzen, etxe ta bizitza duinak denontzat!
Hamarnaka lagun elkartu dira urriaren 28an Bilboko Justizia Jauregiaren aurrean, Sortuk egindako agerraldi aktibistan. Euskararen aurkako askotariko eraso oldea salatu dute, eta hizkuntza politika berriak eskatu dituzte. Eraikinaren aurrealdea hartu dute aktibistek, puzgarri erraldoi batekin, haren alboetako bi aldamiorekin eta 'Euskarafobia stop!' zioen aldamioen arteko pankartarekin. Modu horretan, Euskalgintzaren Kontseiluak azaroaren 4rako antolaturiko manifestazioan parte hartzera dei egin dute.
Bankuek eta energia enpresa handiek inoizko irabazi handienak izan dituzte 2022an, jendartearen bizi baldintzak neurrigabe okerrera doazen bitartean. Zerbitzu publikoen aurkako erasoak orokortzen ari dira, tartean, osasun publikoa eraitsiz; pentsioak eta lan baldintzak are prekarioagoak dira; oinarrizko produktuen garestitzea etengabekoa da, ordaintzeko ezinezkoak diren alokairu eta hipotekak ditugu gure herrietan. Sakoneko norabide aldaketa behar da, denon bizitzen alde.
Melillako sarraskiaren ostean, Bidasoko mugan ekintza egin du Sortuk Nafarroako Afrika United elkartearekin batera, migrazio-politikak eta batez ere mendebaldeak Afrikan darabilen politika interbentzionista salatzeko, horixe baita oinarrian dagoen arazoa. Azken hilabeteetan Bidasoko muga inposatua gurutzatzeko saiakeran bizia galdu duten bederatzi lagunak izan ditugu gogoan: Tessfit Temzide, Abdoulaye Koulibaly, Yaya Karamoko, Sohaibo Billa, Mohamed Kemal, Fayçal Kamadouche, Ibrahim Diallo, Abdourramane Bas eta identifikatu gabeko beste pertsona bat.
Africa Unitedeko Beltxaren interbentzio osoa hemen irakur dezakezu.
Izurria dela eta, emergentzia-estatuen ezarpena herritarren osasuna lehenesteko baino, aukera ekonomiko itzel gisa hartu dute elite politiko eta ekonomikoek, funts publikoak enpresa pribatuetara transferituz. Onartezina da pandemia betean enpresa farmazeutikoek txertoekin negozioa egitea, lehen mailako eta bigarren mailako herritarrak bereiziz, bakoitzaren ahalmen ekonomikoaren eta posta kodearen arabera. Ezinbestekoa da txertoen patenteak liberalizatzea.