PRENTSA ARETOA


bakea eta bizikidetza

Larunbatean Bilboko eta Baionako kaleetan olatua sortzeko dei egiten du SORTUk

Bilboko eta Baionako karrikak olatu erraldoi bihur daitezen, larunbatean Sarek ‘Atera Bidera. Orain Presoak’ lelopean deitu duen manifestaziora joateko dei egin du SORTUk. Olatua sortu eta denon artean mugitu behar dugu, egoera astintzeko, Parisko eta Madrilgo agintariak behingoz mugiarazteko eta salbuespeneko egoera anker hau betiko amaitzeko, gure herriak behingoz bake eta askatasun agertoki bat eraiki dezan.

Euskal preso politikoen egoera konpontzeari dagokionean, ez dugu espero Espainiako Gobernu berriak urrats ausartik egingo duenik jendartearen eta eragileen bulkadarik ezean. Jakin badakigu hori ez dela berez gertatuko. Horregatik da garrantzitsua asteburuan kaleak betetzea, eratu berri den Gobernuak presoak etxera bidean jarriko dituen egitasmoari behingoz hel diezaion.
 

2020-01-09

-
sortu

Sorturen Kontseilu Nazionalak aho batez babestu du EH Bilduren mahai politikoak oinarriei luzatu dion abstentzioren aldeko proposamena

EH Bilduren mahai politikoak oinarriei galdetuko die Espainiar Erreinuan PSOE eta Unidas Podemosen arteko koalizio gobernuari bide emateaz. Mahaiak posizioa finkatu eta proposamena luzatu du: EH Bilduren bost diputatuek abstentzio aktiboaren bidez Pedro Sanchezen inbestidura ahalbidetzea. Horretarako arrazoiak ere azaldu dizkio kidegoari.

Bada, Sorturen Kontseilu Nazionalak aho batez bat egin du EH Bilduren mahai politikoaren irakurketatekin eta proposamenarekin.

Hauteskunde kanpainetan lau lehentasun finkatu genituen: 1.-Inboluzioari eta autoritarismoari aurre egitea; 2.-Azken urteotako politika eta neurri neoliberalak atzerarazi eta langile eta herri sektoreen lan eta bizi baldintzak hobetzea; 3.-Euskal Errepublika helburu, 78ko Erregimenaren krisian sakondu eta gure herriaren autodeterminazio eskubidea eskuratzea; 4.-Euskal preso, iheslari eta deportatu politikoak etxeratzea.

Ez gara inozoak; ezagun zaigu PSOEren historia iluna, baita ere Podemos-ek, ibilbide laburra izanagatik, dagoeneko metatu duen huts egite eta errenuntzia-soka luzea. Ezin eszeptikoagoak gara, beraz, gobernu horrek egin nahi/ahal izango duenarekin. Guztiarekin, baina, PSOE eta Unidas Podemosen gobernu hori aipatu lehentasunetan aurrera egiteko aukera gehien eskaintzen duen eskenatokia delakoan gaude.

Edonola ere, espainiar gobernutan ez, gure herriarengan dugu guk konfiantza. Beti bezala, herri indarra, aktibazio soziala eta borroka izango dira aipatu lehentasunetan aurrera egin eta garaipenak lortzeko giltza.

Dei egiten diogu ezker abertzaleko oinarriari EH Bilduren mahai politikoak deitutako kontsultan parte hartzera eta bere proposamena babesteko.

 

Sorturen Kontseilu Nazionala, 2019ko abenduaren 31n

2019-12-31

-
bakea eta bizikidetza

Lopez de Abetxukoren aurkako jazarpenarekin sufrimendu jakin bat estali nahi dute

Jose Ramon Lopez de Abetxuko preso ohiaren hitzaldia galarazteko saiakerak ez du bakea eta bizikidetza eraikitzen laguntzen; alderantziz, sufrimendua pairatu duten batzuren ahotsa isilarazi nahi da, gertatu diren (eta gertatzen ari diren) sufrimendu jakin batzuk estaltzeko. Jose Ramon Lopez de Abetxukok 31 urte eman zituen kartzelan, eta ezarritako zigorra oso-osorik bete zuen, azken egunera arte, nahiz eta bihotzeko gaixotasun larri eta sendaezin bat izan. Hala ere, sektore politiko batzuek ez dute interesik hitz egiteko oraindik indarrean den ankerkeria bati buruz.

Jesus Loza Espainiako Gobernuaren ordezkariak ez du inolako autoritate etikorik gaiari buruz hitz egiteko. Ixilik egon zen duela gutxi Sanchez Corbik eman zuen hitzaldiagatik. Gogora dezagun guardia zibil hori Kepa Urra torturatzeagatik zigortu zutela, nahiz eta gerora kondekoratu eta mailaz igo zuten. Zertan ari da Loza, orduan? Onen eta gaiztoen kontakizun manikeoa inposatu nahian, horrela oraindik indarrean dagoen espetxe politika krudela justifikatzeko?

Presoen auziak berehalako konponbidea behar du, batez ere gaixotasun larri eta sendaezina dutenen kasuari dagokionean. 2019an bertan hil dira Oier Gomez, Juan Mari Maizkurrena eta Jose Angel Otxoa de Eribe. Haien patua oso bestelakoa zatekeen espetxe-politika mendekuan eta gorrotoan oinarritu izan ez balitz.

20 dira gaixotasun larri eta sendaezina duten preso politikoak. Gaixorik den edozein pertsonak behar ditu arreta berezitua eta ingurune egokia, sendagaiez gain, are gehiago gaixotasuna larria edo sendaezina denean.
 

2019-12-09

-
bakea eta bizikidetza

Berriz ere agerian gelditu da Espainiako demokraziaren kalitate-maila eskasa

Espainiako demokraziaren kalitate maila urria agerian geratu da berriro ere nazioarteko komunitatearen aurrean, Europako Giza Eskubideen Auzitegiak gaur goizean Espainiako Erresuma zigortzean, Frantziako kartzeletan betetako zigorra zenbatzeko eskatzen zuten bi euskal preso politikoren babes-helegiteak ez zituelako onartu.

Ismael Berasategirentzat eta Rufino Arriagarentzat epaia beranduegi iritsi bada ere, Estrasburgoko Giza Eskubideen Auzitegiak zigorrari lotutako kontuez inhibitu dela eta, ebazpenak agerian uzten du, beste behin ere, Espainiako sistema judizialak praktikan eskaintzen duen berme prozesalen gabezia. Izan ere, bi presoek “gutxienez segurtasun juridiko eza” jasan dutela adierazi du.

Estrasburgok maiz egin dio errieta Espainiako Estatuari berme prozesalak ez errespetatzeagatik. Izan ere, Espainiako Erresuma zazpi aldiz zigortu dute dagoeneko, torturak ez ikertzeagatik. Bateragune auzian, horrez gain, bost auzipetuei ere arrazoia eman zien, epaiketa justurik izan ez zutelako.

2019-11-26

-
bakea eta bizikidetza

Mobilizaziorako deia, gaixo diren presoen egoera dramatikoari irtenbidea aldarrikatzeko

Atzeratu egin dute Ibon Fernandez Iradi gaixorik larri den euskal presoari buruzko ebazpena, berez atzo plazaratu behar bazuten ere. Epaileak epea zabaltzea eskatu du erabakia hartzeko. Ondorioz, azaroaren 12ra arte ez da horren inguruko ebazpenik kaleratuko. Horrekin batera, aste honetan bertan Jose Angel Otxoa de Eribe preso ohia hil dela kontuan hartuta, gaixotasun larri eta sendaezina duten presoen egoera dramatikoari berehalako irtenbidea eman behar zaio. Horren harira antolatutako mobilizazioetan parte hartzeak berebiziko garrantzia du. Larunbatean, Sarek antolatuta, 17:00etan Gasteizko Artiumetik abiatuko den manifestazioan parte hartzeko deia egiten dugu.

Fernandez Iradiri 2011n diagnostikatu zioten esklerosi anizkoitza. Aurretik, gaixo diren hainbat euskal presori zigorra etetea onartu zuen fiskaltzak. Crohn eritasuna duen Lorentxa Gimon, esaterako, 2018ko martxoan irten zen kalera. Horrez gain, 2017ko apirilaren 26an utzi zuten aske aurtengo urtarrilaren 26an zendu zen Oier Gomez gasteiztarra minbiziari aurre egiteko.

Fernandez Iradiren kasuan, zigorra eteteko eskaera baztertu zuen Parisko Apelazio Auzitegiak 2016an. Geroztik, bere osasunak ez du hobera egin, eta haren osasun egoeraren inguruan hainbat salaketa eta adierazpen plazaratu dira, Ipar zein Hego Euskal Herrian. Martxoaren 14an, Gipuzkoako Batzar Nagusietako Giza Eskubideen Batzordeak aho batez eskatu zion Frantziako Gobernuari Ibon Fernandez Iradi kaleratzek, bere gaixotasuna dela kausa.

Bestalde, bada gaixorik larri dagoen beste preso bat Frantziako kartzeletan: Gurutz Maiza etxarriarra. Bere askatasuna aldarrikatzeko, Sarek “iluntasunetik etxera” egitasmoa abiatu zuen den irailean.
 

2019-10-31

-