PRENTSA ARETOA


gora herria

Abascalen ekitaldiaren ostean, Kursaal ingurua desinfektatu du SORTUk

Eskuin muturrari, autoritarismoari eta faxismoari aurre egin behar diegu, PP, Ciudadanos edo Vox bezalako taldeek jende askoren etorkizuna arriskuan jartzen baitute, batez ere emakumeen, migratzaileen eta LGTBI kolektiboko kideen kasuan. Horrenbeste lan eta nekeren ostean lortutako hainbat eskubide galtzeko arriskuan jartzen dituzte.

Santiago Abascal buruagi ultraren Donostiako ekitaldia amaitu ondoren, Kursaal ingurua desinfektatu egin du SORTUk. Aktibista boluntario talde batek ingurua prezintoz inguratu eta bazter guztiak ondo garbitu dituzte. Modu horretan, jendeari eskuin muturraren, autoritarismoaren eta faxismoaren arriskuez ohartarazi nahi diegu. Era berean, ekimen honen bidez, talde ultra horiei adierazten diegu hemen ez direla ongi etorriak.

Ekimenean parte hartu duen SORTUko Gotzon Elizburu kidearen esanetan, “Trifatxitoak bazter guztiak zakarkeriaz, irainez eta gezurrez zikindu nahi ditu. Horregatik, Gora Herria! ekimenak desinfekzio kanpaina hau jarri du abian gaitz hau desagerrarazteko, plaga bihurtu baino lehen. Gure etorkizuna dago jokoan”.

SORTUk gisa honetako desinfekzio gehiago egingo dituela iragarri du.

2019-04-13

-
bakea eta bizikidetza

PSOEk ez du funtsezko aldaketarik gauzatu PPren espetxe-politikan

Asier Bengoa euskal preso politikoa Herrera de la Manchako espetxera urruntzea onartezintzat jotzen du SORTUk. Ulertezina da Sanchezen alderdiak iazko udan Gobernura iristean aldaketak iragarri arren, PPren espetxe-politikan funtsezko aldaketarik ez gauzatzea. Gobernu frantziarrak Lannemezanera hurbildu ondoren, estraditatu eta Herrera de la Manchako espetxera urrundu dute Asier Bengoa Euskal preso politikoa.

Frantziako estatuan 12 urtez preso egon eta bere zigorra amaitu ondoren, otsailean espainiaratu zuten Bengoa, gelditzen zaion hiru urteko zigor bat betetzeko. Ordutik hona, Soto del Realen egon da.

Rajoy agintean zen bitartean, aldaketak egin zituen Gobernu frantziarrak eta 2018ko lehen sei hilabeteetan 25 preso hurbildu zituen Mont de Marsan eta Lannemezango espetxeetara. Hala ere, sei hilabete horietan espainiaratutako preso politiko guztiak urrundu egin zituzten sistematikoki.

Gero, Sanchezen Gobernuak aldaketak iragarri zituen. Baina espetxe-politika berri horrek ez du abiadurarik hartzen. Eskuin muturreko lobbyek baldintzatu egiten dute edozein erabaki. Salbuespen legeak eta espetxe-politika eraiki zituen espainiar eskuinaren beldur da Gobernua. Guztiz salagarria da Sanchezen Gobernua sektore ultra eta atzerakoienen horien gatibu izatea.

PSOEren agintaldian EPPK-ko 25 preso hurbildu dituzte, baina bakar bat bera ere ez dute Euskal Herrira ekarri. 200-400 kilometroko gerrikoa mantentzen ari dira. Eta orain Frantziako Gobernuak hurbildutakoak urruntzen ditu Espainiakoak.

2019-04-12

-
demokrazia eta erabakitzeko eskubidea

Arkaitz Rodriguez: “Ezkerreko independentismoaren bozka bakoitza kolpe bat da 78ko Erregimenarentzat”

Arkaitz Rodriguez SORTUko idazkari nagusiak 78ko Erregimena kolpatzen jarraitzeko ideia berretsi du gaur eguerdian Berriozarren eginiko ‘Kolpez Kolpe’ ekitaldi nazionalean. “Apirilaren 28an eta maiatzaren 26an independentismoak jasoko duen bozka bakoitza 78 Erregimenarentzat kolpe bana izango da”, adierazi du.

Rodriguezek gogoratu du Nafarroako Aldaketa indartzeko beharra. “Orain lau urte bota genuen Erregimena erakundeetatik. Orain Aldaketari eutsi behar diogu eta Aldaketan sakontzen jarraitu behar dugu. Horretarako, kalera atera beharra dago, mobilizatu beharra dago. Eta horretarako erakundeetan ahalik eta EH Bildurik indartsuena ere behar dugu. ”, bere esanetan. Horrez gain, SORTUko idazkari nagusiaren aburuz, “ezkerreko soberanismoak 78ko Erregimenari behin-betiko kolpea eman behar dio”.

Haritz Romeo: “Kolpez Kolpe lortuko dugu Erregimena eraistea Nafarroa berria eraikitzeko”

Haritz Romeo, SORTUren Nafarroako idazkariak gogoratu du 78ko Erregimenak Nafarroan ezarritako botere-sistemak ahalbidetu duela frankismoan agintzen zuten familia berberek agintzen jarraitzea. “Nahieran kontrolatu dituzte botere-guneak: instituzionalak, ekonomikoak, mediatikoak eta kulturalak. Zer pentsatu behar dugun esan digute, zer egin, zer sentitu; eskura dituzten baliabide guztiak erabiliz, Nafarroa alternatiboaren ahotsa isilaraztearren”.

Era guztietara, herri-sektoreek aurrera egitea lortu dute eta ezarritako sistemari arrakala ireki diote, Romeoren arabera. Horregatik, lan horretan sakontzen jarraitzea premiazkoa da. Etorkizunari aurre egiteko bi modu daude bere iritziz: “Ustelkeriaren eta murrizketen Nafarroara itzuli, pribatizazio eta errepresioen garaira, pertsonak lehenesten ez diren horretara; edo bestela Nafarroaren burujabetzaren bidean sakontzea geure bizitzaren gaineko kontrol handiagoa eta normaltasun politikoa eskuratzeko, Erregimenaren zutabeak deseraikitzeko prozesuari helduta.

“Nafarroa alternatiboak lehioak irekitzea eta alfonbrak altxatzea lortu du. Borrokatutako urte hauek guztiek balio izan dute herri-sektoreak ahalduntzeko eta erakundeak demokratizatzeko prozesua abiatzeko balio izan dute. Baina ez da nahikoa. Erakundeek, eragile sozialek eta herri-sektoreek insistitu egin behar dugu. Ezin gara konformatu pitzaduratik datorkigun oxigeno apurrarekin. Kolpez kolpe lortuko dugu erregimena eraistea Nafarroa berri bat eraikitzeko“.

2019-03-16

-
borroka feminista

Politika feministaren garaia da

SORTUk bat egiten du Euskal Herriko Mugimendu Feministak Martxoaren 8rako egin duen greba deialdiarekin. Eta bide batez, baliatu nahi dugu Politika Feministaren garaia dela ozenki aldarrikatzeko.

XXI. mendeko iraultzak emakumeon eta herrion izena du. Lurraldea behar da bizitza erdigunean jarriko duen antolamendu ekonomiko eta politikoa gauzatzeko. Era berean, burujabetza eta boterea behar dira lurralde honetan bizi den komunitateak trantsizio feminista gara dezan. Feminismoa behar da, bizitzak erdigunean kokatu eta justizia soziala gauza dadin.

Feminismoaren eta askatasunaren kontrako ofentsiba mundu zabalean indartzen ari den honetan, Euskal Herria aukera bilakatzen da. Emakume sektore zabal baten aktibazioaren eta feminismoaren hedapen historiko baten aurrean gaude. Euskal jendartearen gehiengoak emakumeok pairatzen dugun biolentzia eta diskriminazioei erabateko ukoa agertzen die. Euskal lurraldeetako instituzioetan aldaketa politiko eta sozialaren aldeko indar-harreman berriak daude, gehiengo sindikal abertzale eta konprometitua dago eta jendarte antolatu dinamikoa.

Euskal Herriko Mugimendu Feministak eskatu du Itun Sozial berria eraikitzea. Inoizko baldintza soziopolitiko egokienak ditugu demokrazia eta emantzipazioan urratsak emateko, feminismoa ardatz duen jendarte baterantz ibilbidea hausnartu, adostu eta jorratzeko. Feministok aukera hau baliatu behar dugu, politika feministak zentroan ezarriz, emakumeek beren etorkizuna libreki erabaki dezaten bideak eskainiz.

Emantzipazio-borroken historian ezagunak dira aurrera eta atzera urratsak, lortutako espazioak eta galdutako eskubideak. Ofentsiba neoliberalak inboluzioa ekarri du, pobrezia eta babesgabetasuna biderkatu, esparru publikoa murriztu... Hortaz, galtzen ari garenaren defentsa soilean baino, eredu berri baten eraikuntzan kokatu behar dugu. Krisiari aurre egiteak urgentzia du eta urgentzia hori aukera bilakatu behar da Euskal Herri hobea lortzeko, emantzipazioan urratsak emateko.

Martxoaren 8a feminismoa politikaren erdigunean eta politika feministari beharrezko ahalduntzea emateko ibilbidean hitzordu bat da. Euskal Herriko Mugimendu Feministak Euskal Herrian dagoen sentsibilitateari mobilizazio bidea eskaini eta euskal jendartearen politizazioan lagunduko du berriz ere.

Ezkerreko independentiston erronka ez da M-8ra mugatzen, harago joanda, M-8ak Feminismoa euskal agenda politiko, ekonomiko eta sozialean kokatzeko bidea izan behar du. Politika Feministaren garaia da!
 

2019-03-04

-
euskal herria

Xabier Arzalluzen heriotza dela-eta

Xabier Arzalluz Antia buruzagi jeltzale ohiaren heriotza dela-eta, SORTUk doluminak helarazi nahi dizkie haren senitartekoei, gertuko lagunei eta, oro har, Euzko Alderdi Jeltzalearen komunitate politiko osoari.

Arkaitz Rodriguez SORTUko idazkari nagusiaren esanetan, “gure arteko ezberdintasun politikoak gorabehera, haren itzal handia eta herri honen historian utzitako oinatz sakona aitortu nahi ditugu”. 

2019-02-28

-