Desparasitazio Kanpaina Nazionala

Zer dira parasitoak?

Besteek egiten dutenaz elikatzen dira, eta horrenbestez kalteak eragiten dizkiete besteei. Bestela esanda, gainerakoen edota gizartearen bizkar bizi dira.

Zertan eragiten digute?

• Aseezinak dira: beti gehiago nahi dute. Ahalik eta etekinik handiena lortu nahi izaten dute besteen kontura. Gainera, berdin zaie beste horiek pertsona xumeak diren ala ez; berdin zaie langileak, pentsiodunak edota eskaleak badira.
• Egoista hutsak dira: ez daude prest gizarteari ekarpenik egiteko, haien fortuna besteen ahaleginari esker lortu badute ere. Ez dute zergarik ordaindu nahi.
• Boteretsuak dira: gobernuengan eragiten dute etekin handiagoak lortzeko. Murrizpen, salbuespen eta hobari fiskal ugari dituzte. Haien fortuna paradisu fiskaletan gorde ohi dute. Haien egoerak okerrera eginez gero, erreskateak edo amnistia fiskalak lortzen dituzte.
• Ez dute mugarik: nahiago dute gizarte dual bat, desberdintasun sozial handiekin. Sektore pribatua eta haien negozioak indartzeko lan egiten dute, sektore publikoaren eta haren bermeen kaltetan.

Nola egin aurre?

1. Kontzientzia hartuz: desparasitatutako gizarte bat askoz justuagoa eta berdintsuagoa izango litzateke, langile-klasearen bizkar bizi diren parasitorik gabe.
2. Egunero lan eginez eta mobilizatuz: pentsio duinen alde (1.080 euro); pentsio-sistema propioaren alde; gure eros ahalmena murriztu duten lan-erreformak baliogabetzearen alde; lan-hitzarmen propioen alde; soldata duinen alde, pobretutako langilerik egon ez dadin (1.200 euro gutxienez); beka-sistema propioaren alde; guk geuk hemen erabaki dezagun, inolako injerentzia eta inposaketarik gabe.
3. Urtarrilaren 30eko Greba Orokorrarekin bat eginez.

Euskal preso, iheslari eta deportatuak etxera!

Bada garaia Espainiako Gobernuak espetxe politika berri bat abian jartzeko. Euskal preso, iheslari eta deportatu guztiak etxeratzea herri gisa dugun erronka da. Ezinbestekoa da bakea eta bizikidetza eraikitzeko preso guztiak etxeratzea. Bide orri partekatu bat adostu behar dugu horretarako presoak, gizarte zibileko erakundeak eta instituzioen artean.

Bilboko gabonetako izotz pistan, presoei gure elkartasuna eta maitasuna adierazteko ekimena egin dugu.

Konstituzioari txistu ozena

Espainiako ereserkiari ozen egin diogu txistu Bilbon, Gobernuaren Ordezkaritzaordetzaren aurrean, Konstituzioaren egunaren harira. Ekintza baten bidez, Espainiako erregimena herrien eta pertsonen kartzela dela salatu du SORTUk, eta 78ko Erregimenarekin hausteko beharra nabarmendu du, autodeterminazio eskubidea eta askatasuna eskuratzeko.

Plaza eliptikoan, buruz behera esekita agertu dira Francoren, Felipe Borboikoaren eta Juan Carlos Borboikoaren erretratu erraldoiak. SORTUko 35 aktibista Gobernuaren ordezkaritzaordeara begira paratu eta hizki batzuk zabaldu dituzte, “España, herrien kartzela” esaldia eta “askatasuna” hitza osatuz. Orduan, megafoniatik Espainiako ereserkia entzuten ahal izan da, baina, txistukada ozen batek estali egin du musika.

Espainiako ereserkiari egindako txistukadaren bidez, Konstituzioa salatu du SORTUk. Urtza Alkorta bozeramailearen esanetan, “Konstituzioak ez zuen frankismoarekin hautsi eta Francok ezarritako bi oinarriak bere egin zituen: Espainiaren batasuna eta kapitalismoa. 78ko erregimena elite ekonomikoen eta oligarkiaren mesedetan aritu da eta ari da, langile-klasearen kaltetan. 78ko erregimena, horrenbestez, herrien eta pertsonen kartzela dugu. Guk argi dugu: beharrezkoa da 78ko erregimenarekin haustea, askatasuna eta autodeterminazio eskubidea gauzatzeko”.
 

Kapitalismoa ala bizitza

Gure planetaren baliabideak mugatuak izan arren, eredu kapitalistak ez du mugarik. Gelditu ere ez da egiten, aurrean harrapatzen duen guztia suntsitu arte. Sistema kapitalistak eragin du klima-larrialdia, beste desoreka nabarmen askorekin batera. Konpondu ezik, areagotu egiten ditu emakumeen zapalkuntza, migrazio-krisiak, goseteak, pobrezia, langabezia, prekarietatea, gerra...

Mende amaieran, Lurraren tenperatura 3ºC igoko da orain arte bezala jarraituz gero. Hurrengo 10 edo 20 urteetan hartuko diren neurriek erabakiko dute gure ondorengoen geroa.

Hego Euskal Herrian, herritar bakoitzak 9 tona CO2 isuri zituen 2017an, Europako Batasunean (8,4 tona) eta Estatu espainiarrean (7,2) zenbatutako kopuruaren gainetik.

Alarma gorri guztiak piztu dira. Munduak trantsizio sozio-ekologikoa behar du eta gu gure aletxoa jartzeko prest gaude. Gure iparrorratza da karbono isurietan neutroa izango den Euskal Herri batera abiatzea. Hemen asmatu genuen auzolana, besteak beste, basoak, bideak edo ibaiak garbitzeko. Gainera, iraunkortasunaren eta ingurumenaren alde esperientzia ugari metatu ditugu azken hamarkadetan (kontsumo taldeak, borroka antinuklearra, AHTaren aurkakoa, energia berriztagarrien aldeko kooperatibismoa...). Arazo global honi aurre egiteko prest gaude. Burujabetza behar dugu, tresna propioak behar ditugu.

Kapitalismoak bizitza jartzen du arriskuan. Norabide aldaketa behar dugu. Berandu baino lehen.

Irailaren 20tik 27ra mobilizazioak mundu osoan.

Eskuin muturraren gorroto eta gezurrezko hitzak desinfektatuz

Albert Riverak Ugaoko frontoiako hitzaldian gezurrak eta gorrotoa zabaldu nahi izan baditu ere, SORTUko aktibista boluntarioek berak jaurtitako horiek desinfektatu dituzte, Ciudadanosen ikuskizunaren ostean. Modu honetan, Ugaoko herriak emandako erantzunarekin bat egiteaz gain, autoritasimoaren eta eskuin muturraren arriskuez ohartarazi du SORTUk.

Garbiketa-ekintzan parte hartu duten kideen arabera, “eskuin muturra eta autoritarismoa arriskutsuak dira Euskal Herriarentzat. Gaur Ciudadanos alderdia etorri da Ugaora, Albert Rivera buru dutela, gorrotoz eta inposizio diskurtsoa zabaltzera. Euskal gizarteak aspaldi egin zuen bakearen aldeko hautua. Ciudadanosen helburua ordea euskal herritarrak bakea eta askatasuna lortzeko egiten ari diren ahalegin oro zapuztea da, interes alderdikoiak lehenetsita”.

“Trifatxitoak bazter guztiak zabarkeriaz, gezurrez eta irainez bete nahi du. Desinfekzio brigada antolatu dugu gaur bere gorroto-diskurtsoa garbitzeko. Euskal Herrian bakea eta bizikidetza eraikitzea oztopatu nahi duelako”.

#GoraHerria