sortu

Nazio ekitaldia irailaren 27an, Iruñeko Anaitasunan

2025-04-03

Euskal Herriaren nazio izaeraren aitortza eta autodeterminazio eskubidea aldarrikatuko du Sortuk irailaren 27ko ekitaldian, ‘Askatzera lotuak’ lelopean; Sahatsa Jauregiren obra bat oinarri duen kartelarekin iragarri du.

Udazkenean mende erdia beteko da 1975eko Txiki eta Otaegi fusilatu zituztenetik, baita Franco hil eta Juan Carlos I Borboikoa estatu buru izendatu zutenetik ere. Fusilamenduek Euskal Herriaren askatasun egarria itotzeko helburua zuten; baina ez zuten lortu. Francoren heriotzak, berriz, Trantsizio Demokratikoa deituriko “transakzio” bat baino ez zuen ekarri, “guztia lotuta, eta ondo lotuta” uzteko xedez. Ezker abertzaleak haustura aldarrikatu zuen orduan, eta gaur ere ezinbestekoa dugu hori. Bide horretan, frankismoak ondo lotuta utzitako korapilo hura askatzeko abagunea dugu, Euskal Herriaren independentziara bidean. Horregatik, Euskal Herriaren nazio izaeraren aitortza eta autodeterminazio eskubidea aldarrikatzeko baliatuko dugu 50. urteurrena: irailen 27an nazio ekitaldia egingo dugu, Iruñeko Anaitasunan.

Francok ondo lotuta utzi nahi izan zituen frankismoaren soka luzeak, tartean, Juan Carlos Borboikoa bere oinordeko hautatuz. 50 urte igarota, oraindik orain soka horiek agerikoak dira Espainiako Estatuko hainbat aparatutan. Horri heldu beharrean, Espainiako Gobernuak erreforma edo trantsizio gisa saldutakoa aldarrikatzeko baliatuko du 50. urteurrena, eta iragarria du dozenaka ekitaldi egingo dituela. Aldiz, guk, Euskal Herria askatzera lotu ginenok, herria altxarazi eta hari itxaropena eman zion Txiki eta Otaegiren belaunaldi haren eta ondorengoen oinordekook, gure askapen borroka eta konpromisoa dugu ospatzeko.

Helburu horrekin, ‘Askatzera lotuak’ leloarekin egingo dugu ekitaldia irailaren 27an Iruñeko Anaitasunan, Txiki eta Otaegi fusilatu zituzten egun berean; Euskal Herria askatzeko borrokara lotu garenontzako hain seinalatua den egunean. Azken urteotan egun hori berrezaugarritzeko eta iruditeria berri batekin aberasteko bidea egiten ari gara. Hala, Euskal Herriko hainbat sortzailek egin dituzte irailaren 27a iragartzeko azken urteotako kartelak. Aurtengoan, Sahatsa Jauregi artistak urteurrenerako propio sortutako obra bat du oinarri kartelak.

Irailaren 27rako sortutako lanean metala eta sokak uztartu ditu Jauregik. ‘Askatzera lotuak’ leloari tiraka ondo du obra, eta hitz horiek materialaren bidez osatzeko ariketa egin du, mugimenduaren eta idazteko prozesuaren bidez. Hala, objektua ez da pieza trinko bat, moldagarria baizik, eta hainbat forma har ditzake. Beraz, obra bera ere, hamarkadetako euskal nazio askapen mugimendua nola, bizirik eta mugimenduan dagoela esan daiteke, egokitzeko eta moldatzeko gaitasunarekin.

Eta egokitzeko gaitasun horri eta milaka militanteren konpromisoari esker, gaur, Euskal Herriaren burujabetza mailan koxka bat gora egiteko aukera baten aurrean gaude. Bide horretan aurrera egiteko, ezinbestekoa izango da Euskal Herrian herri aktibazioa eta hainbat esparruren bultzada. Sortuk bere ekarpena egingo du norabide horretan, ilusio eta indar guztiekin. Eta irailaren 27ko Iruñeko ekitaldia indar eta ilusio hori biderkatzeko mugarria izango da; hainbat belaunalditako milaka kide batu, nondik gatozen oroitu, eta nora goazen berrestekoa. Horregatik, ezkerrekoak eta abertzaleak diren herritar guztiei dei egiten diegu data gorde eta bertaratzera.

Ondo lotuta utzi (nahi) zutena askatzeko garaia da!
Askatzera lotu garenon garaia da!