gora herria

Espainiako eta Frantziako lege arrazistarik ez! Burujabetza behar dugu!

2025-03-19

Sortuk egungo migrazio politikak salatzeko ekintza aktibista bat egin du Atzerritarrentzako Bilboko Bulegoan. Etzi, Arrazakeriaren Aurkako Nazioarteko Eguna, mugimendu antirrazistak deituta egingo diren mobilizazioetan parte hartzera dei egin du.

Sortuk Espainiako eta Frantziako lege arrazistak salatzeko ekintza aktibista bat egin du gaur, asteazkena, martxoak 19, Bilbon, Atzerritarrentzako Bulegoan: 'Euskal Herriak burujabetza. Eskubideak denontzat!' eta '#Antiracism' zioten pankartak eskegi dituzte bi aktibistak eraikin horren balkoian. Etzi, ostirala, martxoak 21, Arrazakeriaren eta Xenofobiaren Aurkako Nazioarteko Eguna da, eta testuinguru horretan egin du ekintza Sortuk. Hain zuzen, egun horretan Euskal Herriko hainbat tokitan mugimendu antirrazistak deituta egingo diren mobilizazioetan parte hartzera dei egin dute. Bilbon 18:00etan abiatuko da mobilizazioa, Jesusen Bihotzatik.

Oihana San Vicente Sorturen Nazio Kontseiluko kideak hartu du hitza ekintza aktibista egiten ari ziren bitartean. Honako hau adierazi du: "Lege horiek atzerritik gure herrira euren bizitza proiektua garatzera datozen pertsonen eskubideen urraketa eta babesgabetasuna ahalbidetzen dute". Eta gehitu du Atzerritartasun Legeak bestelako esplotazio eta abusu-zirkuituen menpe egotera behartzen dituela pertsona migratzaileak.

Atzerritarrentzako Bulegotik metro gutxira, hainbat jatorri eta kulturatako herritarrek hartu dute hitza Pio Baroja plazan (Ekuador, Bolivia, Etiopia, Brasil, Rif, Kolonbia, Sahara eta Palestina), bertan jarritako plataformara igota. Euren bizipenak eta jasaten duten bazterkeria kontatu dituzte, eta arrazismoa borrokatzera dei egin diete erakunde zein herritarrei. Plazan bildutako beste aktibistek hainbat hizkuntzatan idatzitako aldarriak zituzten panelak erakutsi dituzte, hala nola 'Espainiar lege arrazistarik ez', 'Euskal Herria harrera herria', 'Antirrazismoa, antifaxismoa', 'Eskubideak denontzat!'. Beste kide batzuek, berriz, esku-orriak banatu dizkiete inguruan zebiltzan herritarrei.

San Vicentek aldarrikatu du Euskal Herriak burujabetza behar duela migrazio politiketan ere: "Herritartasun eta migrazio politika propioak egin ahal izateko eskumenak behar ditugu, gure nazioa aintzat hartuz, kulturartekotasun politika aurrerakoi eta antirrazistak egiteko. Denok eskubide eta betebehar berberekin". Hala, aurkako noranzkoan ari diren indarrak deitoratu ditu: "Pertsonen jatorriaren eta kulturaren arabera gure herria zatitzeko estrategia oso bat dago martxan eskuineko alderdi eta komunikabideen aldetik, arrazakeria bultzatuz". Guztiarekin, nondik gatozen begiratu beharrean, nora joan nahi dugun pentsatu behar dela nabarmendu du: "Gure ustez, norabidea argia da: Euskal Herri aske eta antirrazista".